“ભલે આપણે સૌ મુસીબતના માર્યા,
પરંતુ છે હિંમત, નથી હામ હાર્યા,
સપનાઓ, ઇચ્છાઓ, તિતિક્ષા, છે બાકી,
તુ લેતો જા છોને પરીક્ષા છે બાકી”
એક ગુજરાતી નાટકમાં આ સાંભળેલું, મુશ્કેલીઓ, મૂંઝવણ, તકલીફો, આ બધું દૂર કરવા આજીવન આપણે કામ કરતા હોઈએ છીએ, અને ઘણીવાર થાકી જતા હોઈએ છીએ કે, હજુ કેટલું કરવાનું ? અને ક્યાં સુધી આ ચાલ્યાં કરશે ? અત્યારે કેટલાક યુવાનોમાં 25-30 વર્ષે મીડ લાઇફ ક્રાઇસિસ આવી જાય છે. એમની હિંમત ઓછી થઈ જાય છે અને કામ પ્રત્યેની ધગશ બાષ્પીભવન પામે છે અને રહી જાય છે માત્ર વસવસો કે, મારું વિશ લીસ્ટ પૂરું ન થયું.
લોકોની થાકી જવાની, હારી જવાની, સપનાંઓ ન જોવાની ચોક્કસ ઉંમર હોતી હશે ? કે પછી Age is just number અહીં પણ લાગુ પડે છે! શું વૃધ્ધ થતાં જેમ ચામડીઓમાં કરચલીઓ પડે છે એમ લોકોની કલ્પનાઓમાં પણ કરચલીઓ પડે છે ખરી !
આ બધા પ્રશ્નોના જવાબ સામે જવાબ છે, 77 વર્ષના ઊર્મિલાબહેન આશર, જે ગુજ્જુબેન ના નાસ્તા થી બહુ ફેમસ છે, ઊર્મિલા બહેનના જીવનમાં એક પછી એક કેટલીય મુશ્કેલીઓ આવી પણ એમની હિંમત અને જીવન પ્રત્યેના એક હકારત્મક વલણને કારણે તેઓ આજે સરસ રીતે પોતાનો બિઝનેસ ચલાવે છે. પોતાના ત્રણ સંતાનો છે ગુમાવનાર આ માતા જીવનના ઉત્તરાર્ધમાં પણ કાર્યશીલ છે, હસતાં હસતાં દરરોજ 12-14 કલાક કામ કરે છે. અને મહિને 3 લાખ કરતા પણ વધુ કમાઈ છે. તેમનો આ બિઝનેસ કોવિડ19ના સમયે અથાણાંના ઓર્ડરથી શરુ થયો હતો અને જે આજે આટલો વિકસિત છે, ગુજ્જુબેનનો પૌત્ર હર્ષ તેમની સાથે આ બિઝનેસ ચલાવે છે. ગુજ્જુબહેન પોતાની યુટ્યુબ ચેનલના માધ્યમથી લોકો સુધી વાનગી બનાવવાની રેસિપી અને જીવન જીવવાની જડીબુટ્ટી પહોંચાડે છે, તેમના ચહેરા પર કાયમ મુસ્કાન અને શરીરમાં કામ કરવાની ઊર્જા હોય છે. 77 વર્ષના દાદી પોતાના મનની વાત અને હાથનો સ્વાદ લઈને દેશ-વિદેશ જઈ આવ્યા છે, ઉપરાંત Tedxના સ્પીકર પણ રહી ચૂક્યા છે. અને હાલમાં માસ્ટર સેફ ઓફ ઇન્ડિયાના મંચ પર પણ તેઓએ સ્થાન મેળવ્યું છે.
આ દાદીની વાત એટલા માટે કેમકે ઘણા બધા યુવાનો એવું વિચારીને હાર માની બેસે છે કે, ” આપણે હવે શું કરી લેવાના”, “કરવાનો સમય જતો રહ્યો”, “મારે તો કરવું હતું પણ પરિસ્થિતિએ મને સાથ ન આપ્યો”, “મારા ઘરના લોકો એ મને સપોર્ટ કર્યો હોત તો આજે હું પણ કોઈ સારી જગ્યા પર હોત”, તો એ તમામ લોકોને કહેવું છે કે, તમારી સ્થિતિ કદાચ દાદીથી પણ ખરાબ હશે, પણ તમારી ઉંમર ઘણી નાની છે તમારી પાસે ઘણો સમય છે, અને તમારી પાસે ઘણી આવડત છે ખાલી જરૂર છે મન લગાવીને તેના પર કામ કરવાની, આઠ કલાકની નોકરીમાં પણ આપણે કામચોરી કરવાની તરકીબો શોધી લઈએ છીએ, અને પછી અસફળ થવાનો દોષ સ્થિતિ, પરિસ્થિતિ અને ઘરના લોકોના માથે મારીએ છીએ, તો આવી છેતરપિંડી જાત સાથે ક્યાં સુધી કરીશું ? ક્યા સુધી અરીસા સામે ‘ દ્રાક્ષ ખાટી છે ‘ નો રાગ આલાપ કરીશું ? એક વાર દ્રાક્ષ સુધી પહોંચવા માટે પ્રયત્ન કરી લઈએ.
2023ના બનાવેલા નિયમો ભલે ઠેકાણે પડી ગયા હોય પણ નક્કી કરીએ કે કામ કરવા ખાતર નહિ, કામ કરવું છે એટલે કરીશું. જીવનમાં સફળતા મેળવવવા ઘણા પાપડ વણવા પડે, ઘણી બધી વસ્તુ ત્યજવી પડે, ત્યારે જ સંઘર્ષને પેલે પાર ઊભેલી સફળતા રૂડી રૂપાળી અને મીઠડી લાગે. આપ સૌ આ મહેનતમાં તપો અને પછી સફળતાને પામો તેવી શુભકામનાઓ.
#છેલ્લો કોળિયો: સફળતા એ 15 સેકેન્ડની રિલ્ જેવી નથી, પણ સફળતા એક પુસ્તક જેવી છે, એક ફિલ્મ જેવી છે જેની પાછળ ઘણી બધી કલાકો, ઘણી બધી સમજણ એટલી જ ધીરજ અને ઘણા બધા પ્રયાસો સમાયેલા છે.
~ ડૉ. હિરલ બ્રહ્મક્ષત્રિય
