અધ્યાય – ૩
‘ના પ્રિય! તેને એકમની માલિકી આપી દો.’,અંજનાએ કેસરીના જમણા ગાલને નરમાશથી સ્પર્શ કર્યો.
અંજના મહેલના બીજા માળે તેના શયનકક્ષમાં વિશાળ પલંગ પર સૂતી હતી. પલંગને પૂર્વથી પશ્ચિમ દિશામાં ગોઠવેલ હતો. ઓરડામાં હાલમાં બન્ને જણા એકાંતમાં હતા. કક્ષની છતનું કેન્દ્ર ઝુમ્મરથી શણગારેલું હતું. વાદળી રંગની દીવાલોને જાંબલી રંગના નાના સ્ફટિકોનો ઉપયોગ કરીને શણગારી હતી. અંજનાની પાસે જ કેસરી બિરાજેલો અને તેનો જમણો હાથ કેસરીના જમણા હાથમાં હતો.
‘પણ તેણે મારા અને તેના પિતા સાથે દગો કર્યો છે.’, કેસરીએ ક્રોધિત નજરે કહ્યું.
‘આ ક્ષણે, તમે મારી સાથે રહો. તમે એક નવું એકમ પેદા કરવા માટે સક્ષમ છો. તો પછી તે મૂર્ખ વિશે ચિંતા કેમ કરવી?’, અંજનાએ તેના વિચારો રજુ કર્યા.
‘હું મારી મિલકતને હસ્તગત કરવા માટે કેવી રીતે મંજૂરી આપી શકું?’
‘અત્યારે આપણે આપણા બાળક માટે સમય આપવાનો છે, જેને આપણે ભગવાન શિવના આશીર્વાદથી લાંબા સમય પછી મેળવવાના છીએ. હું સમય વેડફવા માંગતી નથી.’
‘મારા સામાનનું શું?’ કેસરીએ ચિંતા વ્યક્ત કરી.
‘હું અને આવનાર બાળક જ તમારો સામાન છે.’
‘તે હું જાણું જ છું. પણ મારો સમય, સંપત્તિ અને આરોગ્ય વિશે શું, કે જે મેં એકમના વિકાસ માટે અને સિદ્ધિઓ માટે ખર્ચ કર્યા છે? આ પ્રશ્નો મને પરેશાન કરે છે.’, કેસરીએ અંજનાના કપાળ પર હાથ મૂક્યો.
અંજનાએ ધીમેથી તેની આંગળીઓ કેસરીની હથેળી પર મૂકી, ‘હું તમારી સાથે છું. આપણી સુખદ ક્ષણો આપણી સાથે છે. આપણો ભૂતકાળ આપણી સાથે હતો, વર્તમાન આપણી સાથે છે અને ભવિષ્ય આપણી સાથે રહેશે. ચિંતા કેમ કરવી?’, કેસરીની હથેળીને ચુંબન કર્યું,‘આપણે નવું અને અદ્યતન યાન બનાવટનું એકમ બનાવીશું. તમે વિજ્ઞાન, તકનીક અને તેની ઉપયોગીતા જાણો જ છો. ફરી એક નવા યુગનો વિકાસ કરશો, અને બાલી તમારી વિરુદ્ધ ખૂબ જ નાનો બાળ છે. ’
‘પણ…’
‘શ...!’, અંજનાએ કેસરીના હોઠ ઉપર તેના જમણા હાથની પહેલી આંગળી રાખી
*****
આઠ મહિના પછી
કેસરી બાલી દ્વારા થયેલા દગાને ભૂલાવી સ્થાયી થવાનો પ્રયત્ન કરી રહ્યો હતો. બાલી કિશકિંધાના નવા ઉભરતા ઉદ્યોગસાહસિક તરીકે ઉગરી આવેલો. તેણે યાનની કાર્યપ્રણાલી સંબંધિત ઘણી સમસ્યાઓ ઉકેલી હતી. કેસરી પણ ઉકેલ જાણતો હતો, પરંતુ તેનો ઉપયોગ કરતા પહેલા બાલીએ તેને બજારમાંથી બહાર ફેંકી દીધો હતો. કેસરીએ તેની આવડતને આધારે યાનના સમારકામ માટેનું કેન્દ્ર શરૂ કર્યું હતું. અવકાશયાનના એન્જિનમાં સુધારણાને લગતાં નાના નાના કામ તે કરતો હતો. તેણે એકમનું નામ ‘વાનર ગેરેજ’ રાખ્યું, કેમ કે તેમના સમુદાયનું નામ વાનર હતું. બાલીને કેસરીએ શરૂ કરેલા નવા સાહસની ચિંતા નહોતી. તે જાણતો હતો કે, હાલના યુગમાં અવકાશયાનના વ્યવસાયમાં કોઈ પણ તેના જેટલો સક્ષમ નહોતો. તેણે અન્ય ગ્રહોના યાન વેપારમાં જોડાયેલી સંસ્થાઓ સાથે સહયોગ કર્યો હતો.
‘કેસરી! હું તારી સાથે કામ કરવા માંગુ છું.’ રિક્ષરાજા ગેરેજમાં કેસરીની બરાબર સામે ઊભા ઊભા જણાવવા લાગ્યો.
‘મારા મિત્ર! હું તારી મદદ કરવામાં અસમર્થ છું. હું એવી વ્યક્તિ સાથે કામ કરી શકતો નથી કે જે મારો સામાન સાચવી ન શકે.’, કેસરીએ બેસવા માટે ખુરશી આપી.
‘પણ, હું તારા બાળપણનો મિત્ર છું. જીવન સુધારવા માટે આપણે ઘણી વસ્તુઓની શોધ કરી છે.’, રિક્ષરાજાએ મનાવવાનો પ્રયાસ કર્યો.
‘હું બધુ ભૂલી ગયો છું. મારા કુટુંબને ખુશ કરવા માટે આજે મારી પાસે આ એકમ છે. વિશાળ અવકાશયાન બનાવવા માટે લીધેલા મારા દેવાની ચૂકવણી કરવામાં તે મને મદદ કરે છે.’, કેસરીએ તેની લાગણીઓને રિક્ષરાજા સમક્ષ મૂકી.
‘હું આજે અને હંમેશાં તારી સાથે જ રહીશ.’
‘હું જાણું છું. પરંતુ હજી પણ “બાલી” નામના મૂળાક્ષરો અને જોડણી મારા મગજમાં કાળા રંગથી ઘાટ્ટા છપાયેલ છે. ’
‘પણ…’
‘બસ, મને મારી દુનિયામાં એકલો છોડી દે, રિક્ષરાજા! હું ભૂતકાળની માફક જ ફરીથી વિકાસ કરીશ અને તમામ સંજોગોમાં જવાબદારી સંભાળીશ.’ કેસરી ગેરેજમાંથી બહાર નીકળી ગયો.
બજારમાં, તેણે યાનના સમારકામ માટે ગેરેજ ખોલ્યું હતું, તેમાં કેસરીની મદદ માટે અન્ય બે વ્યક્તિઓ પણ કામ કરતી હતી. સૂર્યાસ્ત પછી, કેસરી પોતાનો સંપૂર્ણ સમય અંજના સાથે વિતાવતો અને ગેરેજ પર કરવામાં આવતી આખા દિવસની પ્રવૃત્તિઓની ચર્ચા કરતો. ગર્ભમાં રહેલું બાળક નિયમિતરૂપે માતાપિતા દ્વારા થતી ચર્ચાને સ્વીકારતું હતું. તેણે રિક્ષરાજાની મુલાકાત વિશે પણ અંજનાને જણાવ્યું હતું. અંજનાએ રિક્ષરાજા દ્વારા ચલાવવામાં આવતી, વ્યાજે ધન લેવાની યોજના સ્વીકારી, કેસરીને નાના પાયે રોકાણ માટે સૂચવેલું.
કેસરીએ પોતાનો જમણો હાથ અંજનાની કૂખ પર રાખીને સમજાવ્યું,‘પ્રિય અંજના! હું ફક્ત આપણા બાળકના ભાવિની ચિંતામાં છું. જ્યારે તે ગ્રહ પર આવશે, ત્યારે તેની બધી આવશ્યકતાઓ પ્રાપ્ત કરશે. હું નવું સમાધાન કરી કોઇ યોજના ઘડવા નથી માંગતો. મારી પ્રતિબદ્ધતાઓ ફક્ત આપણા બાળક પ્રત્યે જ છે.’
‘હું તમારા નિર્ણય અને યોજનાની પ્રશંસા કરું છું. હંમેશા તમારા સત્ય તરફ જ રહીશ. આપણું બાળક પણ આપણા માર્ગનું પાલન કરશે અને તે જ રીતે ચાલશે.’, અંજનાએ તેનો હાથ કેસરીના જમણા હાથ પર દબાવ્યો.
બન્ને વિચારોનું વાતાવરણમાં બાષ્પીભવન કરી, મહેલની પાસે જ રાખેલ તેમના નવા ઘરની છત પર તે જ સ્થિતિમાં સૂઈ ગયા. મહેલ બાલી અને તેના મિત્રો દ્વારા કબજે કરવામાં આવ્યો હતો.
*****
નવમા મહિનાના અંતે
કેસરી કિશકિંધાની નજીક સ્થિત સ્થળ પર કાર્યમાં વ્યસ્ત હતો. તેને લગભગ ૨૪૮ મીટર, જમીનના પોપડા નીચે પ્રવાહી સામગ્રી, હકારાત્મક રૂપે હોવાના સમાચાર મળ્યા હતા. તેણે આખી જિંદગીમાં પહેલી વાર, તેના દ્વારા નિહારેલી નવી સામગ્રી વિશે વિચાર્યું હતું. તેણે માહિતી એકત્રિત કરી અને સામગ્રી પાછળની એક વાર્તા જાણવા મળી હતી. એક ખેડૂત અનાજના દાણા કાપતો હતો. પાકના સમયે, ખેડૂતે જમીન ખોદવાનું કામ શરૂ કર્યું, અને કેટલાક પ્રકારના પથ્થરો કાળા રંગથી રંગાયેલા દેખાયા હતા. તેની પાસેથી, કેસરીના ગેરેજના એક કામદારને સમાચાર મળ્યા, અને કામદારે અભ્યાસ માટે એક પથ્થર લીધો હતો.
કેસરી આ વિશે જાહેર કરવા માંગતો નહોતો. તે તેના આવનાર બાળક માટે નવી તક તૈયાર કરવા માંગતો હતો. બાળક મોટો થાય ત્યાં સુધી, તેના માટે વિકસીત ઉદ્યોગ તૈયાર કરી રાખવાનો હતો. તેથી તેણે સ્થળની મુલાકાત લેવાનું નક્કી કર્યું હતું. પથ્થર લઇને આવનાર તેનો એક કામદાર તેની સાથે જ હતો. બન્નેએ કેસરીની બનાવેલી નાની મોટર સાથે લીધી. કાળા પથ્થરોની જગ્યા તરફની મુસાફરી અર્ધા કલાકમાં પૂરી થઈ ગઇ. તે સંપૂર્ણરીતે પર્વતોથી ઘેરાયેલું ક્ષેત્ર હતું. ઘાટ્ટા કાળા રંગની માટીએ જમીનને સંપૂર્ણ રીતે ઢાંકી દીધેલી. એક ખેડૂત અહીં કેવી રીતે કામ કરી શકે? તે બાબતે કેસરીને વિચારતો કર્યો. કેસરીએ પથ્થર મળેલા સ્થળ પર પથરાયેલી રેતીને યંત્રની મદદથી હવામાં ઉડાડી જગ્યા એક્દમ ચોખ્ખી રીતે દેખાય તેવી કરી દીધી.
તે જ સમયે, કેસરીના ઘરે, અંજનાની તબીયત કંઇ ઠીક નહોતી. તે તેના ગર્ભાશયની નીચે અનુભવાયેલી પીડાને ઓળખી ન શકી. કેસરીના પિતા પણ ઘરે હતા. તેમણે શહેરની મધ્યમાં મેડિકલ કોલેજના પ્રાધ્યાપક તરીકે પસંદગી પામેલ ડૉક્ટરને જાણ કરી. ડૉક્ટર કેસરીનો સારો મિત્ર હતો. તેના સૂચન મુજબ બૃહ્શપતિ અંજનાને હોસ્પિટલ લઈ ગયા. પરિચારિકાએ સુવાવડનો સમય આવી ગયો હતો, તે બાબતને સમર્થન આપ્યું. અંજનાએ.ભગવાન શિવના મહામૃત્યુંજય જાપ શરૂ કરી દીધેલા, જેના કારણે તેને થોડી રાહત જણાઇ હતી. તે જાણતી હતી કે કેસરી હોસ્પિટલ પહોંચશે ત્યાં સુધી ફક્ત જાપ જ તેનો આશરો હતા.
કેસરીએ કાળા પથ્થર અને તેના નીચે રહેલા ઘટ્ટ પ્રવાહીને શોધવા ૮ ફૂટ લાંબા યંત્રને વિવિધ નાના નાના ઉપકરણો જોડી તે જગ્યા પર જ વિશાળ યંત્ર તૈયાર કરી દીધું. કામદારે પણ પાસે આવીને યંત્રને બરાબર ગોઠવવાનો પ્રયાસ કર્યો. કેસરીએ યંત્રની અણીવાળો ધારદાર ભાગ જમીનમાં જ્યાં ખાડો કરવાનો હતો ત્યાં બરોબર મધ્યમાં નિશાન બનાવી ગોઠવી દીધો અને થાકના કારણે તેના મુખમાંથી દબાણ સાથે હવા નીકળી જેથી સીટી જેવો ધ્વનિ પેદા થયો.
અંજના અત્યંત પીડા સહન કરી રહી હતી. તે ચીસો પાડી રહી હતી. ડૉક્ટર પાસે શસ્ત્રક્રિયા એક જ વિકલ્પ રહ્યો હતો. અંજનાને ઓપરેશન થિયેટરમાં લઇ જવામાં આવી. તે સ્ટ્રેચર પર સૂતેલી હતી. ડોકટરે તેને કરોડરજ્જુની નજીક એનેસ્થેટિકની જરૂરી માત્રા, છ ઇંચની સોય સાથે કાળજીપૂર્વક લગાવી. કૂખ પર શક્તિશાળી પ્રકાશના સ્ત્રોત ગોઠવવામાં આવ્યા. ડૉક્ટર કેટલીક ધાર્મિક પ્રક્રિયાઓ પણ શીખેલા હતા અને તેથી તે દર્દીનું સંચાલન કરતી વખતે, પૃથ્વી પર ઘણા વર્ષો પહેલા ઉચ્ચારાયેલી “ભગવદ્ ગીતા” બોલતા. એવું માનવામાં આવે છે કે ગીતામાં ભગવાન શ્રીકૃષ્ણ સ્વયંએ કુરુક્ષેત્રના યુદ્ધ વખતે, અર્જુનને યુદ્ધ માટે મનાવવા અને જીવંત દાખલાઓ સાથે વિશ્વને જીવન સંદેશાઓ આપવાની વાત કરેલી છે.
કેસરીએ જમીનમાં છિદ્ર બનાવવા યંત્ર શરૂ કરવા માટે કામદારને જમણો હાથ મુઠ્ઠી વાળીને ઊંચો કરી અંગુઠો બતાવી સંકેત આપ્યો.
ડૉક્ટરે સિઝેરિયનની શરૂઆત માટે પરિચારિકાને રોબોટ શરૂ કરવા સંકેત આપ્યો. સામાન્ય રીતે કિશકિંધાના દરેક હોસ્પિટલમાં રોબોટીક શસ્ત્રક્રિયા જ થતી હતી.
શારડી યંત્ર ઘોંઘાટ કરતા કરતા જમીનમાં દાખલા થવા માંડ્યું હતું. યંત્ર ખૂબ જ ઝડપથી ગ્રહના ગર્ભ તરફ ગતિ કરી રહ્યું હતું.
રોબોટે અંજનાની કૂખ પર ચોક્કસ સ્થાન ચિહ્નિત કર્યું અને બાળકના જન્મ માટે શસ્ત્રક્રિયા કરવા તૈયાર હતો.
કેસરીએ શારડી યંત્રને એવી રીતે બનાવ્યું હતું કે તે જરૂરીયાત મુજબ કામ કરી શકે. યંત્રે ખૂબ જ ઝડપથી ૨૪૮ મીટર સુધી કવાયત કરી નાંખી હતી.
રોબોટે ડાબા હાથમાં સર્જિકલ બ્લેડ સંભાળી. અંજના એનેસ્થેટિકની અસરથી બેભાન થઈ ચૂકી હતી. રોબોટે ચિહ્નની નજીક બ્લેડ રાખી અને હલકા દબાણ સાથે ચલાવવા તૈયાર હતો.
શારડી યંત્ર કાળું બની ગયેલું, કેમ કે ઘટ્ટ પ્રવાહી તેના સંપર્કમાં આવી ચૂક્યું હતું. શારડીના વિસ્તારમાંથી અચાનક ધડાકા સાથે ઘટ્ટ કાળું પ્રવાહી કેસરીના ચહેરા પર ઉછળીને પડ્યું. તેણે ડાબા હાથથી ચહેરો સાફ કરી દીધો અને છતાં પણ ચહેરા પર તે પ્રવાહી થોડી માત્રામાં ચોંટી રહ્યું.
રોબોટે બ્લેડને હળવેકથી અંજનાની કૂખ પર ચલાવી. બ્લેડ રક્તથી લાલ બની ગઇ. કૂખમાંથી નીકળતું રક્ત ઉછળીને રોબોટના ચહેરા પડ્યું. પરિચારિકાએ રોબોટના ચહેરા પરથી લોહીના ડાઘ સાફ કર્યા, છતાં પણ ચહેરા પર થોડી માત્રામાં રક્ત રહી ગયું.
કેસરીના હાથમાં તે ઘટ્ટ પ્રવાહી ચોંટી ગયું. ગ્રહ પર કંઈક નવું શોધવા બદલ તે ખુશ હતો. તેણે પ્રવાહીમાં રહેલા તત્વોના ગુણધર્મો અને તેના ઉપયોગોનો અભ્યાસ કરવા માટે, ઘટ્ટ પ્રવાહીના નમૂના લીધા.
ચહેરા પર લોહીના ડાઘને કારણે રોબોટ બાળકને પ્રાપ્ત કરવામાં અસમર્થ હતો. ડૉક્ટરને આગળની કાર્યવાહી કરવાની હતી. તેણે નવજાત બાળકને હાથમાં લીધું. બૃહ્શપતિને રડવાનો અવાજ સંભળાયો. તે ખુશ હતો.
કેસરી એક એવું સાધન લઈને આવ્યો હતો, જેના કેન્દ્રમાં રાખેલી સામગ્રી વિશેની તમામ માહિતી શોધી શકાતી હતી. તેણે પ્રવાહીને તે સાધનના કેન્દ્રમાં મૂક્યું. સાધને તપાસ શરૂ કરી અને પરિણામમાં દર્શાવ્યું કે તે ઘટ્ટ પ્રવાહી "ખનિજ તેલ" હતું. ઘણા વર્ષો પહેલા ફક્ત પૃથ્વીના ગર્ભમાં આ સામગ્રી હતી. પરંતુ હવે કેસરીને તેના ગ્રહ પર પણ મળી આવેલી. અન્ય વિગતો તેણે યંત્રમાં સાચવીને મૂકી અને ઘરે પાછા ફરવાનું નક્કી કર્યું.
*****
હોસ્પિટલમાં, કેસરી, અંજના ઉપરાંત તેનો ડૉક્ટર મિત્ર, તેમને ફાળવેલા ખાસ રૂમમાં બેઠાં હતા. પારણામાં બાળક સૂતું હતું.
કેસરીએ પ્રેમથી અંજનાના કપાળ પર હાથ મૂક્યો અને કહ્યું, ‘આભાર.’
‘નામ સૂચવો.’, અંજનાએ કપાળ પરથી કેસરીનો હાથ ખસેડ્યો અને બાળકને પારણામાંથી બહાર કાઢવાનો પ્રયાસ કર્યો.
કેસરીએ તેને મદદ કરી,‘આપણે ભગવાન શિવને નમન કરીએ છીએ. અને તે આપણને શિવની જ ભેટ છે. તો મને લાગે છે કે…’
‘તમે શું વિચારો છો, તમને શું લાગે છે?'
‘તે અધર્મીઓને બરોબરનો પાઠ ભણાવશે.’
‘શું બોલો છો?’, અંજનાનો ચહેરો નિસ્તેજ થઈ ગયો.
‘ચિંતા કરીશ નહિ; હું એમ કહી રહ્યો છું કે તે શિવનો ઉપહાર છે. તે શિવનો ભાગ છે. અને શિવની જેમ જ તે બીજાના ઘોર અહંકારનો પણ નાશ કરશે. ’
‘ઓહ! તો પછી તમારું સૂચન શું છે? ’
‘હનુમાન – ઘમંડનો નાશ કરનાર.’
*****
ક્રમશ:.......
