જિદા નું ભવિષ્ય પોલિટિકસ
તરુણ અવસ્થામાં ડગ માંડી રહેલો જિદો બહુ જિદ્દી માણસ. જિદાને કોઈપણ કામ કરવું હોય તો જ કરે ! કરે ત્યારે જિદાના હો હા હોકીરો જુઓ . મોહલ્લાના લોકોથી માંડીને સગાવ્હાલા તેમજ સ્કૂલ મિત્રોથી માંડીને જે કોઈપણ લાગતાં –વળગતા હોય તેને પોતે કરેલું કામ જિદો પહોચાડે જ, ત્યારે જ જિદાને શાંતિ મળે , આવો જિદો , જિદ્દી ! તે પછી બાપુજીએ જિદાને શાકભાજી લેવા મોકલ્યો હોય કે પછી ગાંઠિયા લેવા કે પછી કરિયાણું લેવા , જિદો મનમાં આવે તો જ કામ હાથમાં લે અને કામ કર્યા પછી બધાને ખબર પડી જ જાય કે આજ જિદો શાક લાવ્યો , કરિયાણું લાવ્યો , ગાંઠિયા લાવ્યો , એ પણ ફાફડા ! પછી પૈસા ભલેને બાપુજી ના કેમ ન હોય ?!
કામ જિદો પોતાના નામે જ ચડાવે ! બાપુજી વિચારે કે મારુ બેટુ પૈસા મારા , દીકરો મારો અને બસ આટલું અમથું કામ કરે છે તેમાં તો જાણે કેમ સિંહ ન માર્યો હોય ? તેવું વર્તન કરે છે , આ જિદો ! બાપુજીને તો ચપટીકમાં સાઇડમાં ધકેલી દે છે , બધુ કામ પોતાની માથે જ ચડાવે છે , બાપુજી તો જાણે કેમ હોય જ નહિ ? આગળ જતાં શું કરશે , આ જિદો ? મને તો તેની ખુબજ ચિંતા થાય છે !
એટલામાં એક દિવસ જિદાના ઘરે એક જ્યોતિષી પધાર્યા , જિદાના બાપુજીએ જ્યોતિષીનો ખુબ જ આદરસત્કાર કર્યો અને પ્રેમથી સોફા ઉપર બેસાડયા . જિદાની મમ્મી ઘરે હાજર ન હોય એના પપ્પાએ જિદાને કહ્યું જો બેટા , જિદા ! આ જે આપણાં ઘરે જ્યોતિષી પધાર્યા છે તે બહુ મોટા વિદ્વાન છે . બેટા તેમના માટે ગોરા માથી એક ગ્લાસ પાણીનો ભરતો આવ , જા બેટા. જિદો થોડીવાર જીદ કરીને પછી પાણી ભરીને લાવ્યો અને પછી----- હું પાણી લાવ્યો ! મે જ્યોતિષ અંકલને પાણી પાયું , જોયું મે પાયું , જિદાની પ્રશિદ્ધિ ચાલુ થઈ ગઈ ! પેલા જ્યોતિષ તો આ બધુ જોઈને આભા જ બની ગયા ! તેમણે જિદાને પોતાની પાસે બોલાવ્યો , બેટા જરા અહિ આવ તો. જિદો પાસે આવતા પેલા જ્યોતિષીએ જિદાનો હાથ તપાસ્યો અને પછી બોલ્યા - વાહ બેટા ! તારા તો ગ્રહ ખુબજ જોર કરે છે , તું તો કોઈ મોટો પોલિટિશ્યન બને તેવું તારા ગ્રહ જોતાં લાગે છે !
આ બધુ સાંભળતા જિદાના પપ્પા નવાઇ પામ્યા અને બોલ્યા – ધન્ય ભાગ અમારા , ધન્ય ભાગ ! આજે આપશ્રી અમારા ઘરે પધાર્યા અને આપશ્રીએ મારા દીકરાનું ઉજ્જવળ ભવિષ્ય જોયું ! નહીં તો અમોને આ અમારા દીકરાનું ભવિષ્ય ડામાડોળ લાગતું હતું ! આ સાંભળી પેલા જ્યોતિષાચાર્ય બોલ્યા-- જુઓ વડીલ ! આમાં એવું છે ને કે દરેક વસ્તુ અમે લોકો ના હાથની રેખા જોઈને જ નથી કહેતા અમુક વસ્તુ અમે અમારા અનુભવોથી પણ કહીએ છીએ , આ તો ક્યારેક હાથ જોવો એ તો સામેવાળાને સારું લગાડવા માટે જ ફક્ત હોય છે , હકીકતે દરેક કિસ્સામાં હાથ જોવો જરૂરી નથી હોતો ! આ તમારા દીકરાએ જે પાણીના ગોરામાંથી મને એક ગ્લાસ પાણીનો આપ્યો અને પછી કઈ એની પ્રશિદ્ધિ કરી છે , કઈ પ્રશિદ્ધિ કરી છે કે ન પૂછો વાત ! આખો ગોરો પાણીનો તો તમારા ઘરમાં હતો જ , આ દીકરાએ તો ફક્ત આ પાણીને મારા સુધી પહોચાડવાનું જ કાર્ય કર્યું છે, બીજું કઈ નવું કાર્ય કર્યું નથી ! આતો એક સ્વાભાવિક વસ્તુ કહેવાય પરંતુ આ સ્વાભાવિક વસ્તુ ને તેને જે રીતે પ્રશિદ્ધિ આપી છે તે એક અસ્વાભાવિક વસ્તુ ગણાય ! આવી વસ્તુ એક પોલિટિશ્યન જીવ હોય તે જ કરી શકે , અન્ય નું આવું કામ નહીં ! કારણકે પૈસા પબ્લીકના , પાણી નદીનું , પોતાનું શું ? પોતાનું કામ ફક્ત લોકો સુધી પહોચાડવાનું જ ! આ જે તમારા દીકરાએ ગોરામાથી એક ગ્લાસ પાણી કાઢીને પહોચાડ્યુ એ રીતે જ તો ! જો ,જો ,તમે ગિરધારીલાલ આ જિદો તમારો દીકરો એક દિવસ પોલિટિશ્યન બનીને જ જંપશે ! આ એક જ્યોતિષાચાર્ય નું નહીં પરંતુ એક અનુભવી બુઝૂર્ગ નું કથન છે અને તે એક દિવસ જરૂર સાચું પડશે જ , તમે જરાય મુંઝાવ માં ગિરધારીલાલ !
આટલું કહી પેલા પ્રખર જ્યોતિષાચાર્યએ વિદાય લીધી , ગિરધારીલાલ ગદ- ગદ નયને તેમણે જતાં જોઈ રહ્યા અને જિદો ફરીને પાછો પેલા જ્યોતિષ અંકલને જે પોતે પાણી આપ્યુ હતું તેની પ્રશિદ્ધિમાં હો , હા , હોકીરો કરવામાં મોહલ્લામાં ઓત -પ્રોત થયો ! મોહલ્લાના બધા લોકો બહાર નિકળી આવ્યા , જિદાનો સ્પષ્ટ મોટેથી અવાજ સંભળાય રહ્યો હતો – મે મારા ઘરે આવેલા જ્યોતિષાચાર્ય અંકલને પાણી પાયું , મે પાણી પાયું , મૈ એ એ ......!! મોહલ્લામાં ચૂંટણી પ્રચાર જેવો માહોલ સર્જાણો હતો !!!
લિ. બિપિન આઇ ભોજાણી (કટાક્ષ તથા હાસ્ય વ્યંગ ના લેખક.)
સહયોગ- સંકલન : મૌલિક બિપિનભાઈ ભોજાણી (મિકેનિકલ એંજીનિયર)
