"પૂર્વા એક્સેપ્ટેડ યોર ફ્રેન્ડ રિકવેસ્ટ" ફેસબૂક નું નોટિફિકેશન વાંચીને પરમ ખુશ થયો.
જિંદગીના સાડા ત્રણ દાયકા પુરા કરી ચુકેલો પરમ હવે ઘરના આગ્રહ આગળ ઝૂકીને અને એના પહેલા પ્રેમને ભુલાવીને લગ્ન કરવા માટે તૈયાર થયો હતો. બે મેટ્રીમોની સાઈટમાં રજીસ્ટર કરાવ્યું હતું, જોગાનુજોગ એક સાઈટમાં પરમે પૂર્વાનો પ્રોફાઈલ જોયો અને ગમ્યો એટલે એને રિકવેસ્ટ સેન્ડ કરી, બીજીબાજુ પૂર્વાએ બીજી સાઇટમાંથી પરમને રિકવેસ્ટ સેન્ડ કરી હતી. પરમે આને કોઈ સંકેત માનીને પૂર્વાને ફેસબુકમાં સર્ચ કરી અને તરત પ્રોફાઈલ મળી ગયો, શોધવામાં વધારે તકલીફ ના પડી કારણકે જે ફોટો મેટ્રીમોની સાઈટમાં હતો એજ ફોટો ફેસબૂકના પ્રોફાઈલમાં પણ હતો. એટલે પરમે ફેસબુકમાં રિકવેસ્ટ મોકલી.
નોટિફિકેશન વાંચીને પરમે મેસેજ કર્યો : "હાઈ"
"હેલ્લો"
"આને કો-ઈન્સીડન્સ ગણી શકીએ કે બીજું કંઈ?"
"કેમ? હું સમજી નહીં "
"શાદી.કોમ માં મેં તમને રિકવેસ્ટ મોકલી અને ભારત મેટ્રીમોની માંથી તમે મને મોકલી, એ વાત કરું છું."
"ઓહ, હવે સમજી. જે સમજો એ પણ હું એવી કોઈ વાતમાં માનતી નથી. 32 વર્ષે પસંદગી ના વિકલ્પો ઓછા હોય છે તો કદાચ તમે મારો પ્રોફાઈલ ત્યાં જોયો અને મેં અહીં અને બંનેને યોગ્ય લાગ્યું હોઈ વાંચીને તો રિકવેસ્ટ મોકલી હોય બસ."
"તમારી વાત પરથી લાગે છે કે તમને ખાસ્સો અનુભવ હશે, આઈ મીન ટુ સે તમે બહું બધાં છોકરાઓને રિજેક્ટ કર્યા હશે."
"હા, અને તમારી વાત પરથી લાગે છે કે તમે હજુ નવાસવા છો. શું હું પૂછી શકું તમારે આટલું લેટ કેમ થયું !!?"
"ઘણા કારણો છે, અને તમારી વાત પરથી લાગે છે કે તમારી ચોઈસ ખુબ ઊંચી હશે."
"હા, આખી જિંદગી જેની સાથે કાઢવાની હોય તો એમાં પસંદગીમાં ઉતાવળ કરવી સારી વાત ના કહેવાય. ઘણા કારણોમાંથી એક કહેશો તો ગમશે."
"એક નહિ, બધાજ કહીશ પણ થોડી વાર લાગશે મને ખુલીને કહેતા એટલે અત્યારે એક કહું છું તમારા સંતોષ માટે. મારે કોર્ટ મેરેજ જ કરવાં છે, હું ધામધૂમથી લગન કરવામાં જરા પણ માનતો નથી એ વાત માટે ઘરના ને સમજાવવામાં અને મનાવવામાં ખાસ્સો સમય લાગ્યો મને."
"તો આ એક કારણ મારા માટે ઘણું છે, તમને ના પાડવા માટે. કારણકે હું મારા ઘરમાં મોટી છું, મારી એક નાની બહેને લવ મેરેજ કર્યા છે તો અમારાં ઘરમાં પહેલો પ્રસંગ છે એટલે મને નથી લાગતું કે આ વાત આગળ વધારવા માટે મારા ઘરનાં રાજી થાય. મેં પણ સપનાઓ જોયા હોય બીજી બધી ગર્લ્સની જેમ પણ તમે એ સમજી નહીં શકો એટલે જ કદાચ કોર્ટ મેરેજ ની વાતો કરો છો."
"સમજી તો બધું શકું પરંતુ મને એ બધો દેખાડો લાગે છે, અને હું સમજણો થયો ત્યારથી નક્કી કર્યું હતું કે હું આવા દેખાડા મારા લગનમાં નહીં કરું, મારા ઘરમાં બધાનાં ધામધૂમ થી જ લગન થયા છે, પણ મારે નથી કરવાં એ નક્કી છે. ઇટ્સ ઓકે, મને આવા જવાબની અપેક્ષા હતીજ એટલે કોઈ નવાઈ નથી લાગી મને."
"થેન્ક યુ."
આટલી વાત કરી બંને ઓફલાઈન થઇ ગયા. પૂર્વાને પરમની વાત કરવાની શૈલી ગમી ગઈ, પ્રોફાઇલ ગમ્યો હતો એટલેતો રિકવેસ્ટ મોકલી હતી સાથે બીજા કારણો જાણવાની તાલાવેલી પણ જાગી. પરંતુ અવઢવમાં હતી કે ના પાડીને હવે હું સામેથી મેસેજ કેમ કરું? બીજી તરફ પરમને પણ આવીજ મૂંઝવણ થતી હતી કારણકે પરમને પણ પૂર્વાની નિખાલસતા અને ચોખ્ખી પણ શાલીનતાથી વાત કરવાની સ્ટાઇલ ગમી ગઈ. બંને એકજ શહેરમાં રહેતા હતાં અને બંનેના શોખ પણ સરખા હતા એવું પ્રોફાઈલ પરથી એકબીજાને લાગ્યું હતું એટલેજ રિકવેસ્ટ મોકલી હતી.
*******
"હેપ્પી બર્થડે ટુ યુ & હેપ્પી ફ્રેન્ડશીપ ડે."
જોગાનુજોગ આ વર્ષે પૂર્વાનો જન્મદિવસ અને ફ્રેન્ડશીપ ડે એકજ દિવસે હતા અને રવિવાર હોવાથી પરમે પૂર્વાને ફેસબુક પર મેસેજ કર્યો. પરમ પાસે પૂર્વાનો મોબાઈલ નંબર હોવા છતાં પણ કોઈ દિવસ કોલ, એસએમએસ કે whatsapp નહોતો કર્યો. પણ આજે બર્થડે હતો એટલે થયું કે વિશ કરું.
સામેથી પૂર્વાનો પણ તરત જવાબ આવ્યો : " થેન્ક યુ, હેપ્પી ફ્રેન્ડશીપ ડે. તમને બર્થડે યાદ હતો!!!?"
"હા, તમારાં પ્રોફાઈલમાં ડેટ જોઈ હતી અને યાદ હતી તો લાગ્યું કે વિશ કરવું જોઈએ."
"તમારી યાદશક્તિ સારી લાગે છે, મને તો એમકે તમે ભૂલી ગયા હશો."
"તમે ભૂલવા જેવી વ્યક્તિ નથી. એટલેતો આજે બર્થડે ની સાથે ફ્રેન્ડશીપ ડે પણ વિશ કર્યું. શું આપણે ફ્રેન્ડ્સ બનીને વાતો શેર કરી શકીએ!?"
"ઓકે, મને એમાં કોઈ વાંધો નથી પણ F.B. એટલે કે અહીં જ. હું ઓનલાઈન આવીશ ત્યારે મેસેજ કરીશ. મોસ્ટલી હું રાત્રે 10 થી 11.30 ઓનલાઇન આવું છું તો ત્યારે વાત કરીશું." પૂર્વાને મનમાં હતું અને ભાવતું મળ્યાં જેવું થયું... એ સામેથી મેસેજ કરવામાં ખચકાતી હતી અને આજે પરમે સામેથી મેસેજ પણ કર્યો અને ફ્રેન્ડશીપ પણ ઓફર કરી.
"ઓકે થેન્ક્સ, હેપ્પી બર્થડે અગેઇન" કહીને પરમ ઓફલાઇન થઈ ગયો.
તે દિવસે જ રાત્રે પરમે દિવસ કેવો રહ્યો એ પૂછવા મેસેજ કર્યો અને પછી તો એ રોજનો ક્રમ બની ગયો. સવારે એકબીજાના મેસેજ થી સવાર પડે અને રાત પણ એકબીજાના મેસેજ થી.
*******
"પરમ તે હજું જણાવ્યું નહીં કે આટલું લેટ કેમ થયું લગનની માર્કેટમાં આવતાં!!?" ઘણાં સમયથી વાત કરતા કરતા હવે બંને ખૂબ નજીક આવી ગયા હતા અને તમે માંથી તું ઉપર આવી ચુક્યા હતાં.
"એક રિઝન તો કહ્યું હતું પણ હવે બીજા રિઝન પણ કહું છું. આ દુનિયામાં કોઈ એવી વ્યક્તિ નહીં હોય જેને પ્રેમ નહીં થયો હોય, તો એમાંથી હું પણ કેમ બાકાત રહી શકું!?"
"ઓહ, સમજી. મને એવું લાગ્યું તું તો ખરાં જ પણ કહી નહોતી શકતી. ફેમિલી પ્રોબ્લેમ નડ્યો કે કાસ્ટ!?"
"ફેમિલી. તારે!?"
"મારા કેસમાં પસંદગી ખોટી થઈ ગઈ હતી... એને આકર્ષણ હતું અને અમે બંને પ્રેમ સમજ્યા હતાં, હું તો પ્રેમ જ કરતી હતી કારણકે મારાં કરતા બધી રીતે એ એક ડગલું આગળ હતો. પણ કોલેજ પછી લગનની વાત આવી તો એને મારા કરતાં દેખાવે સારી અને પૈસાદાર બાપની દીકરી મળી ગઈ તો...."
"ઓકે ઓકે સમજી ગયો. પણ આટલાં વર્ષોમાં બીજું કોઈ ગમ્યું જ નહીં? કોઈએ તો પ્રપોઝ કર્યું જ હશે."
"હા, પણ પછી મને પ્રેમ શબ્દથી નફરત થઈ ગઈ."
"એક ખરાબ અનુભવ થાય તો એવું ના હોય કે બધા સરખાં હોય. એવું પણ બની શકે કે આટલા વર્ષોમાં કોઈક એવો પણ આવ્યો હોય કે જે તને સાચો પ્રેમ કરતો હોય."
"હા, એવું ફિલ પણ થયું હોય, પણ મારી નાની બહેને એમની સાથે જોબ કરતાં બીજી કાસ્ટના ડિવોર્સી વ્યક્તિ જોડે લગન કર્યા અને ત્યારે ઘરમાં બહુ બધા પ્રોબ્લેમ થયા હતાં એટલે હવે જો હું પણ એવું કંઈ કરું તો શું થાય એ તું સમજી શકે છે."
"હા, પણ સેમ કાસ્ટ હોય તો લવ ને એરેન્જ મેરેજમાં કન્વર્ટ કરી શકાય."
"હા, પણ એવું હજુ સુધી બન્યું નથી કે એવું કંઈ કરું."
"અને એવું કોઈ મળે તો!?"
"તો હું ચોક્કસ વિચારીશ, મારે બધાનું મહેણું ખોટું પાડવું છે કે હું મારા ફૈબાની જેમ લગન નહીં કરું. 12 વરસથી કોઈ મુરતિયો ગમતો નથી અને મને ગમે તો એને હું નથી ગમતી એ વાત બીજા કોઈ નથી સમજતું અને મહેણાં માર્યા કરે છે."
"થાય એવું, ટેન્શન નહીં લેવાનું. જેને પ્રેમ કરતાં હોઈએ એની સાથે લગન ના થાય એ સમજી શકાય પણ એવી વ્યક્તિ હાથમાંથી ના જવા દેવી જોઈએ જે આપણને પ્રેમ કરતી હોય. લગન એવી વ્યક્તિ જોડે કરાય જે આપણને પ્રેમ કરતી હોય."
"ઓકે સ્વામી પરમાનંદજી... હાહાહાહા... ચાલ ગુડ નાઈટ."
*******
"પરમ, ઘરે છો!?"
"હા, તને ખબર છે કે રવિવારે હું ક્યાંય જતો નથી. કેમ આમ પૂછ્યું!? મારા ઘરે સર્જીકલ સ્ટ્રાઈક કરવાની છો!?" પરમે મજાક કરી.
"ના, પ્લીઝ મજાક ના કર અને અહીં આવી શકીશ!?"
"અહીં એટલે ક્યાં!? કંઇક ખુલીને વાત કર તો સમજાય."
"હું ગણપતિ દર્શન કરવા નીકળી હતી બધા એરિયાના, કાલે વિસર્જન છે એટલે. અત્યારે ગાંધી ચોક વિસ્તારના ગણપતિ પંડાલ માં આવી છું, અંધારું થઈ ગયું છે અને 3 છોકરાઓ ક્યારના મને એકલી જોઈને મારો પીછો કરતાં હોય એવું લાગે છે. મને બહું બીક લાગે છે. ઘરે ભાઈને ફોન કરીશ તો ગુસ્સો કરશે કે કહ્યુંતું કે એકલી ના જા. તું આવી શકીશ!? આરતી શરૂ થાય છે તો હું એ પુરી થાય ત્યાં સુધી અહીજ રહું."
"ઓકે, ચિંતા ના કર, હું આરતી પુરી થાય એ પહેલાં પહોંચી જઈશ." કહીને પરમ તરત પૂર્વા પાસે જવા નીકળ્યો. એકજ શહેરમાં રહેવા છતાં પણ બંને કોઈ દિવસ મળ્યાં નહોતા, બસ અલપઝલપ જોયા હતા જાહેર સ્થળોએ.
આરતી પુરી થયા પહેલાંજ પરમ ત્યાં પહોંચી ગયો અને પૂર્વાને ધરપત થઈ પરમને જોઈને. એ પરમની સાથે બહાર આવી અને પરમે એને બાઇક પર બેસી જવા કહ્યું પણ પૂર્વાએ ના પાડી અને કહ્યુંકે "કેટલી વાર કહ્યું કે તારી સ્મોકિંગ ની આદત તું છોડ પણ તું માનતો જ નથી.... એક કામ કર તું મને રીક્ષા કરી દે, બાકી ઘરનાં કે અડોશ પડોશમાં કોઈ જોશે તો ગલત સમજશે."
પરમને પણ એ ઠીક લાગ્યું અને એણે પૂર્વાને રીક્ષા કરી આપી અને કહ્યું કે "હું તારી પાછળ આવું છું ચિંતા ના કરતી."
રાત્રે રોજના સમયે પૂર્વાનો મેસેજ આવ્યો "થેન્ક યુ પરમ. હું રોજ સાંજે ચાલવા નીકળું છું પણ મને આજ જેવી બીક કોઈ દિવસ નથી લાગી."
"થેન્ક યુ તો મારે કહેવું જોઈએ કે તે મુસીબતના સમયમાં મને યાદ કર્યો."
*******
આમ ને આમ વાતો કરતા કરતા ઘણો સમય પસાર થઈ ચૂક્યો હતો અને પરમને લાગ્યું કે પૂર્વા એના માટે અને એના ઘરનાં માટે બેસ્ટ છે. એટલે પરમે પૂર્વાને વેલેન્ટાઈન ડે એ પ્રપોઝ કરવાનું નક્કી કર્યું.
"પૂર્વા, એક વાત પૂછું!? ગુસ્સો ના કરતી, જે હોય એ ચોખ્ખું કહી દેજે."
"હા બોલને, કેમ આજે આમ બોલે છે!?
"લૂક, મને ગોળ ગોળ વાતો કરતા નથી આવડતી. તું અને હું મેચ્યોર છીએ એટલે સીધી જ વાત કરીશ. શું તને મારી સાથે બુઢાપો પસાર કરવો ગમશે!?"
"હેં!!!......" પૂર્વા ધબકારો ચુકી ગઈ. પરમ એને પણ ગમતો હતો પરંતુ એની સ્મોકિંગની અને કોર્ટ મેરેજની આદત ગમતી નહોતી એટલે એણે કોઈ દિવસ એ બાબતે આગળ વિચાર્યું નહોતું. વચ્ચે એણે ઘણીવાર આ બંને બાબતે આડકતરી રીતે પરમને સમજાવાની કોશિશ કરી હતી પણ નાકામ રહી હતી. અને આજે પરમે આવો પ્રસ્તાવ મૂકીને ચોંકાવી દીધી હતી.
"હા, તે બરોબર વાંચ્યું અને સમજ્યું છે. મને ફરી પ્રેમ થઈ ગયો છે અને હું મારી આખી લાઈફ તારી સાથે કાઢવા માંગુ છું, મારા પાસ્ટ અને બધી ખૂબી અને ખામીની તને ખબર છે. તારી ના હશે તો પણ મને આઘાત નહીં લાગે. જે હોય એ ચોખ્ખું કહેજે પ્લીઝ."
પૂર્વાએ સ્વસ્થ થઈને એક નિર્ણય પર આવી અને પરમને મેસેજ કર્યો "પરમ, તું ખૂબ સારો માણસ છો અને એક મિત્ર તરીકે અદભૂત છો એમાં કોઈ બેમત નથી. પણ મને તારી 2 વાત નથી ગમતી એ તને પણ ખબર છે. એક તો સ્મોકિંગ અને બીજી તારી કોર્ટ મેરેજની જીદ. તો પ્લીઝ મને માફ કરજે હું તારો આ પ્રસ્તાવ સ્વીકારી નહીં શકું. હા, મિત્ર તરીકે હું પુરી લાઈફ તારી જોડે રહેવા તૈયાર છું."
"સ્મોકિંગ મેં 90% ઘટાડી નાખ્યું છે એ તને પણ ખબર છે અને બીજું 10% પણ થઈ જશે. બસ તું હા પાડ એટલી વાર. પણ બીજી બાબતમાં હું ફર્મ છું... અને એનું કારણ તને ખબર છે અને એ બાબતે આપડે બહું દલીલો થઈ ચૂકી છે."
"એને જિદ્દી વલણ કહેવાઈ પરમ. અને 10% ફરી 100% થતાં વાર ના લાગે. એની વે, સોરી. મને નથી લાગતું કે આપણે આગળ વધી શકીએ. મિત્ર તરીકે આમ વાતો ચાલુ રાખવી હોય તો મને વાંધો નથી."
"ઓકે. પણ હું હવે મિત્ર તરીકે રહી નહીં શકું. અમને બોયઝને તમારી ગર્લ્સ જેવું ના ફાવે કે આવડે. માફ કરજે પણ હવે મેસેજ નહીં કરું અને FB એકાઉન્ટ પણ ડીલીટ કરું છું કેમકે બાકી હું કંટ્રોલ નહીં કરી શકું."
પૂર્વાના મેસેજની રાહ જોયા વગર પરમ મોબાઇલમાંથી એકાઉન્ટ અને એપ્લિકેશન ડીલીટ કરી નાખે છે. પણ પૂર્વા સાથેનો 5 વરસનો સમય અને યાદો કેમ ડીલીટ કરે? પહેલાં પ્રેમમાંથી બહાર આવતાં 10 વરસ લાગ્યા હતા અને સમયચક્રે ફરીથી પરમને એજ પડાવ પર લાવીને રાખી દીધો હતો.
*******
10 વરસ પછી....
"અરે પરમ તું!!!? અહીં !!!?" પૂર્વા પરમને અનાથ આશ્રમમાં જોઈને સાશ્ચર્ય પૂછી બેઠી.
પરમ ચોકયો અવાજ સાંભળીને અને એને માનવામાં ના આવ્યું કે સામે પૂર્વા છે. "પૂર્વા તું અહીં!!?"
"હું તો પહેલા ઓળખી જ શકી નહીં તને, બધાજ વાળ સફેદ થઈ ગયા તારે તો."
"હા, કલર કરવાનું 10 વર્ષથી બંધ કર્યું બાકી સફેદ તો વર્ષો પહેલાં થઈ ગયા હતા તને પણ ખબર છે. ચાલ કેન્ટીનમાં બેસીને કોફી પીએ અહીંની ચા અને કોફી સરસ હોય છે અને તને કોફી પસંદ છે."
"અરે વાહ, હજું યાદ છે!!"
"ભૂલવા જેવા કામ હું કરતો નથી પણ સંજોગો ઘણાં સર્જાયા કે જેને ભૂલવાની કોશિશ કરું છું."
બંને કેન્ટીનમાં ખૂણાનું ટેબલ પસંદ કરે છે અને પરમ બે કોફીનો ઓર્ડર આપે છે.
"તે ચા મૂકી દીધી!? કે પછી મને કંપની આપવા કોફી મંગાવી!!!? અને કલર કરવાનું કેમ બંધ કર્યું!?"
"ચા અને ચાહ બંને મૂકી દીધી. ઘણું બધું છૂટ્યું અને ઘણું મૂક્યું. જિંદગી બેરંગ હોય તો વાળમાં કલર કરીને શું ફાયદો!!? તું કહે તારી લાઈફ તો કલરફુલ છે ને!?"
"ઓહો, તું તો અઘરા અઘરા શબ્દો બોલવા લાગ્યો. હા કહી શકાય. તારા ઘરે બધા મજામાં? લગન કર્યા? કેટલાં બાળકો છે? તને બાળકો બહું ગમે છે એટલે મિનિમમ 2 તો હશેજ."
"ઘરે હવે કોઈ છે જ નહીં, આપણી છેલ્લી વાતચીત થઈ પછીના બીજા અઠવાડિએ પપ્પાને મેસીવ એટેક આવ્યો અને એમનાં આઘાતમાં 15 દિવસમાં મમ્મીને. એકલો રહું છું અને હા બાળકો ગમે છે એટલે અહીં છું" આંખના આંસુને રોકતા પરમ પૂર્વાને પૂછે છે "તું કહે, તારા ઘરે બધા મજામાં!? તારા હસબન્ડને કોઈ વ્યસન નહીં હોય અને ધામધૂમથી લગન કર્યા હશે! કિડ્સ તને ગમતાં નહોતા એવું યાદ છે એટલે તને અહીં જોઈને આશ્ચર્ય થયું મને."
"મારા પહેલાં મારી બીજી બહેનના લગન થઈ ગયા પછી ભાઈના. ભાભીના આવ્યા પછી એના અને બધાના મહેણાં વધી ગયા કે ફઈ નો વારસો રાખવો છે કે શું!? એ બધાથી છૂટવા માટે લગન કર્યા કારણકે મારી ફઈની જેમ હું પગભર નહોતી અને મમ્મી પપ્પાના ગયા પછી શું થશે એવી ચિંતા મમ્મી પપ્પા બહું કરતા હતા એટલે એમના આગ્રહ આગળ ઝૂકીને લગન કર્યા પણ સુખ નસીબમાં નહોતું. તારી વાત ત્યારે બહું યાદ આવી કે લગન એવી વ્યક્તિ જોડે કરાઈ કે જે તમને પ્રેમ કરતો હોય. મારા કેસમાં પ્રેમ જેવું કંઈ હતુંજ નહીં. ઉંમર વધે એમ પસંદગી ઘટતી જાય એટલે પછી જે મળ્યું ત્યાં કર્યું પણ ટક્યું નહીં. એમને દારૂ અને સ્મોકિંગ બંનેની ટેવ હતી એ લગન પછી ખબર પડી પણ છેતરાયા પછીનો પસ્તાવો કંઈ કામ ન લાગે. એમના વ્યસને એમનો જીવ વહેલો લઈ લીધો અને મને મુક્તિ મળી ગઈ."
"બાળકો!?"
"નથી. પણ તારા ગયા પછી તારી વાતો અને તારી ખુબજ યાદ આવતી હતી, પહેલા રોજ વાતો કરતા હતા અને રિલેક્સ થઈ જતા હતા એટલે કિંમત નહોતી થતી પણ તારા ગયા પછી હું એકલી પડી ગઈ હતી બધા ઘરના ની વચ્ચે. જ્યારે જ્યારે તારી યાદ આવતી ત્યારે નાના બાળકોને કંઇક ને કંઇક લઇ આપતી અને એમની જોડે સમય પસાર કરીને તને યાદ કરી લેતી."
"તો અત્યારે એકલી રહે છે!?"
"હા, એમના ગયા પછી રૂપિયા અને સમયની કોઈ કમી નથી.... સમય પસાર કરવા ઘરની બાજુમાં પ્લે-હાઉસમાં જાવ છું અને બાળકો વચ્ચે રહીને તને યાદ કર્યે રાખું છું."
"આટલું બધું બન્યું તો એક ફોન કે મેસેજ તો કરાઈ ને તારે!"
"કેમ કરું!? તારો નંબર બંધ આવતો હતો અને FB પરનું એકાઉન્ટ તો તે ડીલીટ જ કરી નાખ્યું હતું. ઘરે તપાસ કરી તો ત્યાં કોઈ બીજું રહેવા આવી ગયું હતું અને એમની પાસે તારી કોઈ માહિતી હતી નહીં. અત્યારે ક્યાં રહે છે અને શું કરે છે તું?"
"મમ્મી પપ્પાના ગયાં પછી એ ઘર વેચીને જેટલાં રૂપિયા આવ્યા એ બધા આ અનાથાશ્રમમાં દાન કરીને અહીં માનદ નોકરી માંગી લીધી, હવે આ જ મારું ઘર અને પરિવાર. આજે વેલેન્ટાઈન ડે છે એટલે કોઈ એક કપલ બાળકો માટે ગિફ્ટ આપી ગયા એ બધાને આપતો હતો ત્યાં તું આવી."
"ઓહ. જે દિવસે અલગ પડ્યા હતાં એજ દિવસે ફરી મળ્યા, આને કો-ઈનસીડન્સ ગણવું કે બીજું કાંઈ!!?"
"મેં હવે એવું વિચારવાનું કે સમજવાનું મૂકી દીધું છે પૂર્વા."
"શું હું એક રિકવેસ્ટ કરી શકું? મને મારો બુઢાપો તારી સાથે અને આ બાળકોની વચ્ચે કાઢવાની મંજૂરી મળી શકશે!?" પૂર્વા હાથ જોડીને બોલી.
પરમ આશ્ચર્ય અને આનંદથી પૂર્વા સામે જોઈ રહ્યો એના હાથ પકડીને હસીને એટલુંજ બોલ્યો "રિકવેસ્ટ એક્સેપટેડ."
*******
-ચેતન ઠકરાર
09558767835
www.crthakrar.com
