Description

ગગનવાલાએ પહેલીવાર અમેરિકામાં પગ મૂક્યો ત્યારે લીલુડા હવાઈ દ્વીપોમાંના રૂડા હોનોલૂલૂ મુકામે યુનિવર્સિટીની કેન્ટિનમાં કાઠિયાવાડી ભામણને બાફેલાં શાક, કોરા ભાત, કાચા સલાડ જેવાં ફિરંગી ખાણાં ખાવાં પડતાં હતાં. મહિનાઓ બાદ એક દૂરના સ્ટોરમાંથી ખાટી કેરીનું અથાણું મળેલું તો શી ખબર બ્રેડની કેટલા ડઝન સ્લાઇસ ખાઈ ઘણા સમયે હિંગ-હળદરના સ્વાદથી પુત્રપ્રાપ્તિ જેવો આનંદ માણેલો. હાલ જર્સી સિટીમાં મૂળા-ભીંડાના પતીકાંવાળી કઢી કે તુરિયાં-નાખેલી-અડદની દાળ કે કોળા-ગુવારનું યા વાલોળ-રીંગણાંનું શાક ને કોબીનો કાચો સંભારો ગગનવાલાના કાઠિયાવાડી કોઠાને લીલાંલહેર કરાવે છે બારેમાસ. લાલ મોગરીના સંભારા માટે તથા ડાળા, ગરમર, કેયળા ને લીલાં મરીનાં અથાણાં માટે ઊડીને ભારત આવવું પડે છે.