રીટાને તેની ભાભી, આંટી અને નાની બહેન શણગારી રહ્યા હતા. ભાભી તો મજાક પણ કરતા હતા, આવી રીતે મને તો મારા લગ્નમાં પણ શણગારવામાં નહોતી આવી. મારૂં માનો તો જો છોકરો હા કહે તો રીટાબેનને આજે જ વળાવી દઈએ. આ સાંભળી સૌના મો ઉપર હાસ્ય છવાઈ ગયું, રીટા હતી પણ દેખાવડી, સપ્રમાણ ઉંચાઈ, ગૌર વર્ણ, દાડમની કળી જેવી દંત પંક્તિ, ગુલાબના ફૂલ જેવા હોઠ, અણીયાળી આંખો, લાંબા કાળા વાળ વગેરે. એક એક અંગનું ઉપરવાળાએ જાણે નવરાશની પળોમાં સર્જન કર્યું હોય તેવી મૂર્તિનું સર્જન એટલે રીટા. સાથે સાથે રમતિયાળ, ચપળ, બોલવાનો મીઠો રણકાર. રીટા જ્યાં જાય ત્યાં સૌના દિલ જીતી લેતી..