ભાગ 12 ફુશાન આઈલેન્ડ, પીળો સમુદ્ર, ચીન અર્જુન અને નાયકને લઈને તાત્સુ ફુશાન આઈલેન્ડ તરફ આગળ વધી રહ્યો હતો, જ્યાં વિલાડ એની રાહ જોઈ રહ્યો હતો. લોન્ગ અને લીને છકાવીને આવ્યા બાદ એ લોકો પોતાને નહિ પકડી શકે એવી ગણતરી કરતા અર્જુનને એ જોઈ આંચકો લાગ્યો કે પોતાની બોટની પાછળ એક બીજી મોટર બોટ તીવ્ર ગતિએ આગળ વધી રહી હતી. "નાયક દૂરબીન આપને.." નાયકનું ધ્યાન પણ પાછળ આવતી બોટની એન્જીનના અવાજના લીધે એ તરફ ગયું હતું. અર્જુન શું વિચારી રહ્યો હતો એ સમજતો હોવાથી નાયકે વધુ કોઈ પ્રશ્નોત્તરી કર્યા વિના પોતાના ખભે લટકતા હોલ્ડઓલમાંથી દૂરબીન નીકાળી અર્જુનને આપ્યું. અર્જુને આંખે