અર્પિતાએ જમીને પોતાની બેગ તૈયાર કરવા લાગી. તેને થયું કે એ બે દિવસ ફરવા અને આનંદ કરવા આવી હતી. ત્યારે માના જીવનના દિવસો પૂરા થવાનો ભય ઊભો થશે એવું કલ્પનામાં પણ વિચારી ના શકાય. તેણે માના ચહેરા તરફ જોયું. વર્ષાબેન આંખો બંધ કરી પડ્યા હતા. કદાચ ઊંઘ આવી ગઇ છે. તેને મા પર દયા આવી. પિતા એનું ઘર અને પરિવારને ભૂલી ગયો પણ તેણે તેમના ઉછેરમાં ક્યાંય કમી રહેવા ના દીધી. અત્યારે તેને લાગ્યું કે માની ઉંમર વધવાને બદલે ઘટી રહી છે. તે વર્ષાબેનના શરીરનું અવલોકન કરી રહી. ચહેરા પર ઉત્સાહ અને આનંદના ભાવ છે. શરીરની કમનીયતા જાણે વધી છે. એટલે જ પુરુષો તેનાથી આકર્ષાતા હશે.